كيف بتميز (الشامي) عن باقي الخلق

* بيفهم في الطب وبيشخص المرض ويوصف الدواء وبيفهم في الكهرباء وتصليح السيارات والطبخ والسياسة والطابة والعمار ... وكل شي بيخطر ببالك.

* بيحط الريموت كونترول بكيس نايلون حتى ما يتغبر وتروح الأرقام.

* بيوقف يتكلم على الباب نص ساعة بعد إنتهاء الزيارة والسلام.

* في خزانة المطبخ عنده عشرين قطرميز فاضي منشان اذا احتاج يستخدمها ومازال مُصِر على جمع المزيد.

* ييجي بعد الموعد بساعتين دون ان يعتذر.

* بيحكي بصوت عالي في المكالمة الدولية منشان التاني يسمعه.

* بيعتبر حاله أفضل واحد في الشراء والمفاصلة بعدين بيكتشف إن المحل اللي جنبه أرخص من غير مفاصلة.

* بيحتفظ بأكياس محلات اللبس والأحذية وورق الهدايا تحت الفرشة لسنوات من مبدأ : إلـّما يلزمو.

* بيشتري قبل الإفطار في رمضان ألف نوع حلو.

* عنده منقل شوي للرحلات يستخدمه مرة واحدة أو 3 مرات إن كترت.

* بيفكر إن أي حدا بيشتغل في الخليج بيغرف مصاري من غير حساب وأغنى واحد في الدنيا.

* بيكون مشغول بقيمة البخشيش طول العشا... ياترى أعطي 25 ولا 50؟.

* بيتخانق ساعة مشان يدفع حساب المطعم بحرارة شديدة ... وقلبو عم يقول حق بق.

* بيفرش شرشف التخت على طقم الكنب منشان ما يتوسخ، ولما يجوا الضيوف بيترك الشرشف.

* بينتظر بفارغ الصبر بياع المحارم أبو : الـ7 بمية المحارم ليموّن لشهرين عالأقل.

* اذا ركب ت********ي... طول الطريق عم يطلع عالعداد.

* عندو التخبيص بلعبة الشدة مصيبة كبيرة . وممكن يخسر رفيقه مشان برتية.




وهذا قاموس مبسط لما يقوله الشاميون:



القاموس الشامي


شاضومة

تعبير مؤنث لا مذكر له يفيد كون المرأة غير مرتبة وليست من الأكابر وتحب الكلام غير المنمق وكثرته


شرنه

(إنظر الشرح في تفسير مصطلح شاضومه )


ملحو على ديلو

يعني لا يقيم وزناً للعشرة والخبز والملح


يلي ببالي بالك

كناية عن أمر يتعذر ذكره...!


معصمص

نحيل بارز العظام


يا إيدكم!

تعبير عن الهرب بسرعة من شيء


زمق

أي هرب ببراعة وحذق، وزمط شرحو


سرّي مرّي

أي جيئة وذهاباً بشكل متكرر إلى حد الغلاظة وتتبعها أحياناً أو تنوب عنها (خدني جيتك) و(كيلي ميلي)


حط بالخرج

أي لا تعبأ بما يقال


على قفا مين يشيل

كناية عن كثرة الشيء وشيوعه


مأنّف

يعني لا يعجبه العجب ولا الصيام برجب


فش نيعو

يعني بدي انتقم منه شر انتقام وهي بالحلبي: يفشر حنكو


أزّت نفسو

أي نفر من الشيء نفوراً كأنه رأى صرصوراً


جفص

صفة للجلف غليظ الروح


حنتر

أي 'تيّس' و'بوزم' في الوقت نفسه


طلع من عيونو عامص

يعني دفع ثمناً غالياً وندم على ما نال


كل طلقة براحة

أي يقوم بالشيء رويداً رويداً بين الفينة والأخرى


يلي بدو يموت يوصّيك بولادو

ذم بصيغة المدح يعني أن المذكور غير أهل لحمل المسؤولية


على كراريت حلقو

يعني مصاب بغثيان شديد وإقياء لا يستطيع كبحه لا بحلال ولا بحرام


لا تكرّك عليه

يعني لا تلح عليه إصراراً


قلبه عميقول حق بق (كما أن القاف تقرأ ء)

يعني أنه يريد أمراً بشدّة لكنه يضمره إضماراً ولا يظهره إظهاراً


· لحم السير عالقبقاب وصاروا المبغضين صحاب

مبينه وما بدها شرح

· يلي بيجي منمدلّه فرشة ويلي ما بيجي منرتاح من وشه

مثل نسائي بحت يفيد عدم الترحيب بأشخاص معينين ما عم يجوا أصلاً


· شو هالتجرة

يعني الأفندي ما عجبته هالحكاية كلها وحاسس إنو تعبو راح أو أدراج الرياح


وحياة خالقك ماني مفارقك

تعبير يفيد غلاظة المتكلم وتغالظه على المتكلم عنه ويتبعه عادة: مومحبة فيك بس بدي دايئك


العين الطرّاءة

عبارة عن التمسخر على المتكلم عنه وأن لا شيء فيه بينحسد عليه


بيقطش وبيلحش

يعني المهذار كثير الهفوات ومن يهرف بما لا يعرف ولسانه يسبق عقله


ولي على ********رتو

تعبير يفيد التحسّر على شخص ما مع لومه على ما فعل (في تناقض، مهيك؟)


كِ ــــــنْ

ب********ر الكاف وتسكين النون يعني اهدأ أحسنلك


كروج

يعني درمل، وبتعبير أفصح افرنقع من هنا، وادحال مثلها


فــز

كمان ب********ر الفاء يعني قوم (أوقف وانت بتكلمني)


جماش

أي همجٌ رعاع مستجحشون


مصطهج

يعني مسلطن، مكيّف، مبسوط أو كما قال سيبويه: منتشي


أفّّعت معو

يعني حمل القشة التي قصمت ظهر البعير وبلغ السيل الذبى


مو نفعان لا للخل ولا للخردل

يعني بلا فائدة تذكر، وأحياناً بقولو من نافع لألله بنافعة


يتمألس

يعني يفتعل السخرية على الآخرين (يتمسخر)


لاطيلو

يعني كمن له منتظراً ومنها المتل القائل: 'قلّو لاطيلك قلّو صاحيلك' يعني هدول تنين ناويين عالشر لبعض وكل واحد منتبه للتاني بس بدون كبريته ليشعلو


ادفشو وشوف ما أجحشو

يعني بالإنكليزي: Fools rush in where angels fear to tread


ما فيه الوتكة

يعني صاغ سليم خالي من العيوب وأحياناً يعني فاضي


ما معو نكله

مفلّس وحالو عدم


أول باشتان.....ثاني باشتان

طريقة في تعداد الأمور والأوامر والأسباب والمسببات (أولاً ، ثانياً)


بظّت عيونو

يعني جحظت العينان حتى كادت المقلتان تخرجان من محجريهما (على طريقة الجاحظ) لما شاف شي عجبو


سك

حقيبة نسائية تقليدية تصنع من قماش (مستعمل) للتسوق وخصوصاً من سوق الجمعة


نازل عالمدينة (أو رايح عالشام)

يعني رايح عالسوق التحتاني، i.e. Going downtown


خسكار

كمية من العمل المقرر ليوم واحد أو بضاعة معدّة للبيع ضمن اليوم


من دهنو سئّيلو

تعبير يفيد الكحتنة والجرب وصرف النقود على الشخص أو الشيء بعد أخذها منه دون التكلف عليه بقرش


ما صرلو بالأصر إلا مبارح العصر

يعني أنه جديد على أمر ما وغرّ فيه وأحياناً تكون إشارة للنفاريش أي باللاتينية nouveau riche


ولاد آدو

يعني المشكلجية والعونطجية وولادين الحرام


سبرتاكو

القطعة الصغيرة التي تكون مسمّرة في كعب الكندرة النسائية من الأسفل (وبتطلع عند أول لبسة بالكنادر الوطنية)


قراضة

يعني نوع عاشر، شي تعبان بنوب (متل الكنادر المذكورة آنفاً والمسمّاة عند البعض: بضاعة لا حول)


متمسح

يعني واحد متبلد المشاعر والأحاسيس متل التمساح بفرد شكل (وبمعنى آخر: لا الحر بحرّو ولا البرد بضرّو)


كل ما حدو بيت السلطان خيلهن بتمد الخنفسة رجلها

مثل شعبي يقال كناية لمن يحب الاشتراك دوماً في أمور لا ناقة له فيها ولا جمل، ولا فهم ولا علم له بها وهو يعتقد أن له ما للآخرين


اندفس

أي: نام أحسنلك، انقبر


تكورت

متل تدولق ، فعل يفيد تناول الطعام، وتزهرم مثله أيضاً


من بيت شقاع لبيت رقاع (وهي تقرأ كالعادة: من بيت شآع لبيت رآع)

تعبير نسواني عن المرأة الشطاطة النطاطة التي تنتقل من بيت لآخر ولو بالشحاطة


عم يحاسب القاضي

أي يقوم بقضاء حاجته في بيت الخلاء


آرعو ونادبو وشــ*شــ*ي وأبو مخطة

أي سوقة القوم والرعاع


انطمز

أي انزعج وبوزم وقلب خلقتو وما عاد يتحاكا


مطهمز

أي مطأطأ أو مطأطئ الرأس


طمبرو (جديد جداً )

أي خورفو وهي بالمعنى الحرفي ركبلو طمبر وفهمكم كفاية


شامم ريحه كرهه

تطلق على المتكبر يلي رافع منخاره وقالب وجهه


آكل كم بحالو

انظر تفسير شامم ريحه كرهه


خود منّي

إنهاء للنقاش ودعوة الطرف الآخر للثقة بما يقول المتكلم دون نقاش.


دواليب الجنة

مصطلح جديد للفلافل ومحاولة لرفع شأن هذه الأكلة الشعبية


عليّ ما عليّ

قسم يريد به المتكلم أن يحلف بالطلاق ولكن سمع أنو هذا لا يجوز فبطلها واستعاض عنها بهذه العبارة.


سم الكرّاتي

تقال عندما يكثر الطرف الآخر من الأكل.


فجعان

أي الحالوش أو الشره


مكـــــــــولك

أي اللألوء الذي يحب تمسيح الجوخ.


كعي فيه

يعني ألح وأصر كثير عليه ولكن الطرف الآخر يرفض


طرفنده

تعبير مؤنث يدل على أنه شيء جميل جداً ومميز


جميع حقوق الغسيل والنشر محفوظة لأهل الشام